Эссе және өлең-жыр байқауы

Ата қазақ аузынан

  • admin
  • 10.06.2019
  • 0
  • 1
  • 363
(Бірінші сөз)

Сан заманды қарытып,
Сан тұлпарды арытып,
Сан соқпақты көнелеп,
Сан қияны көбелеп,
Тұманды тұйық белді асып,
Сусыз, жолсыз шөлді асып,
Сақал-шашты ағартып,
Үдере ұзақ жол тартып,
Тапқандай өмір қонысын,
Қоныстың балқаш сонысын.
Желмаясын шөгеріп,
Асан - қайғы өңі еніп,
Отырғандай масайрап,
Ата қазақ тұр сайрап:
"Уа, шырағым, шырағым,
Қасаңдау еді құлағың,
Табылсын барлық мұратың,
Бар еді бір сұрағым;
Естірте айтып ұғындыр,
Той, думанын маған бір..."
Деді де қарт сөз тосып,
Салды маған құлағын,
"Тойға мен де үн қосып,
Сыр айтам" деді, шырағым.
Тойдың сырын ұққандай
Қуаныш сыртқа шыққандай
Ата қазақ жадырап,
Үні тауды жыққандай:
"Мен бала боп өскелі
Елім мен өмір кешкелі,
Қай белесті аспадым,
Қай қияны баспадым,
Қай азапты көрмедім,
Қай мазаққа көнбедім,
Соның бәрін өткенде,
Бақытты заман жеткенде,
Жерұйық тауып жерінен,
Арылып қайғы елімнен,
Жерімнен қазына ашылып,
Еліме тағдыр бас ұрып,
Бетеге сайын қой өріп,
Тарлау сайын тай өсіп,
Бидайық басы дән болып,
Жарлауыт сайын кен болып,
Толықсып көңілім толғанда,
Еккенім өсіп орғанда,
Тойың болса, қарағым,
Бас болып өзім барамын,
Мақтан қып айтар ерім бар,
Бақытты елдің мүддесін
Ақтайтын дәстүр сенім бар", -
Деді де қарт күлімдеп,
Ұлы тойға сайланды,
"Жетіпті думан күнім" деп,
Ақсақал төрге жайланды.
Ата қазақ айқайлап,
Көне өңінен нұр жайнап,
Шежіресін өмірдің
Шебер сөзбен тұр сайрап.

Екінші сөз
Алтай, Орал, Арқа, Алатау саласын,
Балқаш, Каспий, Арал, Зайсан арасын,
Ертіс пен Сыр, Жайық, Нұра, Жетісу,
Ендей көшіп елім жүрген даласын.
Көз жіберіп кезер болсам өткенін,
Көрем талай асқарлы асу өткелін,
Тайғақ кешу, тар жолында елімнің
Білем меруерт, маржан төгіп кеткенін.
Оны көрер көз бар ма еді елімде,
Жеткізе айтар сөз бар ма еді ерімде,
Көзі күңгірт, үні жым-жырт сардала,
Асыл барын кім еледі жерімде.
Туды Октябрь — жайнады аспан ашылып,
Күн нұрынан жатқан асыл шашылып,
Ерім көрді, елім терді қуанып,
Асылымды қоқым басқан жасырып.
Өмірімді гүлге бөлеп жайнатқан,
Заманым ғой ойымды асыл сайратқан,
Ұлы Ленин партиясы нұр төгіп,
Келер күнге ауылым бүгін жол тартқан.

Басқа да өлеңдері

Қарақұмда тұңғыш май

  • 0
  • 0

Қаңсыған сусыз Қарақұм,
Қарбайып қаңбақ өспеген.
Дөңбекшіп құмды алабың,
Күнің жоқ аунап көшпеген.

Толық

Жар суретіне

  • 0
  • 0

Қайта-қайта мен қараймын
Суретіңе сенің келген.
Жарқын өңді таба алмаймын,
Келбетің тұр мүлде өзгерген.

Толық

Жасыл жапырақ арасында

  • 0
  • 0

Еседі жел кешкі самал,
Отыр ойнап қос өрімтал,
Жасыл жапырақ суылдайды
Сыбдырлайды көк шыбықтар.

Толық


Пікірлер (1)

Жаңылхан

Өте өте керемет тақпақ жарайсыз тағы батылдық туралы тақпақ жазып бере аласыз ба?Өтініш

Пікір қалдырыңыз

Серіктестер

Жүктелуде...