Қожа мен Жібектің өшпес дауысы — Фарида Шәріпова

    Қазақ киносының алтын қорына енген «Менің атым – Қожа», «Қыз Жібек», «Тақиялы періште» фильмдері – ұлт мәдениетінің мәңгілік мұрасы. Бұл туындыларды көрмеген қазақ кемде-кем. Алайда көпшілік осы фильмдердегі Қожа мен Жібек бейнелеріне жан бітірген қазақша дубляж дауысының иесі кім екенін біле бермейді. Қожа мен Жібектің қазақ тіліндегі нәзік те әсерлі дауысын сомдаған — Фарида Шәріпова.

Фарида Шәріпова кім?

Фарида Шәріпова — қазақ театр және кино өнерінің көрнекті өкілі, Қазақ КСР-інің және КСРО-ның халық әртісі, Қырғыз Республикасының еңбек сіңірген мәдениет қайраткері. Ол 1936 жылы 16 желтоқсанда Қытай Халық Республикасының Шәуешек қаласында дүниеге келген. Өнер жолын Қытайда бастап, «Хасен–Жәмила» көркем фильмінде басты рөлді сомдап, көрерменге ерте танылды. 1955 жылы тарихи отаны — Қазақстанға оралып, шығармашылық жолын жалғастырды.

Театрдағы тағылымды жол

1959 жылы Құрманғазы атындағы Алматы мемлекеттік консерваториясының актерлік бөлімін, Асқар Тоқпановтың шеберханасын тәмамдап, М.Әуезов атындағы Қазақ академиялық драма театрына қабылданды. Фарида Шәріпова жарты ғасырдан астам уақыт бойы осы театр сахнасында үздіксіз еңбек етіп, қазақ сахна өнерінің дамуына өлшеусіз үлес қосты.

Кино және дубляждағы қолтаңбасы

Фарида Шәріпова кино өнерінде де ерекше із қалдырды. Ол Шәкен Айманов, Мәжит Бегалин, Сұлтан Қожықов, Әзірбайжан Мәмбетов, Леонид Агранович сынды әйгілі режиссерлердің фильмдерінде маңызды рөлдерді сомдады. Сонымен қатар, дубляж саласында да үлкен еңбек сіңіріп, қазақ көрерменінің жадында сақталған кейіпкерлердің дауысын қалыптастырды.

Ұстаздық және марапаттар

Фарида Шәріпова жас актерлерді тәрбиелеуге де айрықша мән берді. Т.Жүргенов атындағы Қазақ ұлттық өнер академиясында жұбайы, көрнекті актер Ыдырыс Ноғайбаевпен бірге шығармашылық шеберхана жүргізіп, көптеген өнерлі жастың кәсіби қалыптасуына ықпал етті.

Өнердегі еңбегі үшін ол:

• Қазақ КСР халық әртісі,

• КСРО халық әртісі,

• Қазақ КСР Мемлекеттік сыйлығының,

• КСРО Мемлекеттік сыйлығының иегері атанып,

• «Парасат» орденімен марапатталды.

Өшпес мұра

Фарида Шәріпова 2010 жылы 24 қыркүйекте дүниеден өтті. Алайда оның дауысы, сахнадағы бейнесі мен кино өнеріне қосқан үлесі қазақ мәдениетінің мәңгілік қазынасы болып қала береді. Қожа мен Жібектің жүрекке жеткен үні — ұлт өнерінің өшпес үні.

“Journiverse” білім беру орталығының оқушысы: Ғалымжан Қаныбек​