Жетістік жолындағы сенімді серік – Forbes журналы

    Әрбір арманы бар адам үшін білім мен ақпарат – жол көрсететін шамшырақ. Ал кәсіпкерлік пен қаржы әлемінде сол шамшырақтың бірі – Forbes журналы. Ұзақ уақыт бойы ол кәсіпкерлерге, инвесторларға және жаңа идея іздеген жастарға бағыт-бағдар беретін сенімді ақпарат көзіне айналды.

Forbes — 1917 жылы АҚШ-та кәсіпкер және журналист Берти Чарльз Форбс негізін қалаған беделді іскерлік журнал. Бүгінде ол әлемдегі ең ықпалды қаржы-экономикалық басылымдардың бірі болып саналады. Журнал компаниялардың қаржылық көрсеткіштерін жариялап қана қоймай, нарықтағы өзгерістерді, технологиялық трендтерді және инвестициялық мүмкіндіктерді сараптайды. Осы арқылы кәсіпкерлерге дұрыс шешім қабылдауға көмектеседі.

Forbes журналының ең танымал жобаларының бірі – жыл сайын жарияланатын миллиардерлер тізімі. Бұл рейтингте әлемдегі ең бай адамдардың қаржылық жағдайы мен жетістікке жету жолы көрсетіледі. Мысалы, соңғы жылдары бұл тізімде Ілон Маск, Бернар Арно және Джефф Безос сияқты ірі кәсіпкерлер көш бастап келеді. Forbes деректеріне сәйкес, әлемде мыңдаған миллиардер бар және олардың саны жыл сайын өзгеріп отырады. Бұл рейтинг жаһандық экономиканың даму бағытын түсінуге мүмкіндік береді. Сонымен қатар Forbes табысты кәсіпкерлердің тәжірибесін кеңінен жариялайды. Уоррен Баффет, Сатья Наделла, Шерил Сандберг сияқты тұлғалардың өмір жолы мен стратегиялары жас кәсіпкерлер үшін үлкен мотивация көзі болып табылады. Олардың жетістігі табандылық, еңбек және дұрыс шешім қабылдаудың нәтижесі екенін көрсетеді.

Forbes-тің онлайн платформасы да күн сайын жаңартылып, қаржы, бизнес және технология саласындағы соңғы жаңалықтарды ұсынады. Бұл оқырмандарға нарықтағы өзгерістерден хабардар болып, жаңа мүмкіндіктерді дер кезінде байқауға көмектеседі. Сонымен қатар журнал жас кәсіпкерлер мен стартап жобаларды қолдап, олардың идеяларын халықаралық деңгейде танытуға мүмкіндік береді. Forbes – жай ғана журнал емес. Ол – білім мен тәжірибе көзі, жетістікке жету жолында бағыт беретін сенімді серік. Оның материалдары әр адамға өз мақсатын айқындап, болашаққа сеніммен қадам жасауға көмектеседі.

“Journiverse” білім беру орталығының оқушысы: Бахытжан Айжархын