Әйелге ана болған жарасады

Сәбиге барын жасап қарасады,
Келсе де, келмесе де шамасы, әлі.
Жанары мейірімге тұнып тұрған,
Әйелге ана болған жарасады.

Мейірімі еркелікке жалғасады,
Сол үшін таусылмайды тамаша әні.
«Әлдиін» айтып бесік тербететін,
Әйелге ана болған жарасады.

Жеткізем деп тірлікте таласады,
Сауық құрған алаңсыз қалар шағы.
Сән-салтанат, той-думан сүйген гөрі,
Әйелге бала сүйген жарасады.

Жаз қылған қара суық қарашаны,
Тосыннан тарту еткен тамашаны.
Құлдығын қуантуға асығатын,
Әйелге ана болған жарасады.

Аққұба бүлдіршіндер қара, сары,
Қазақтың арта берсін бала саны.
Сылқым бол, сүйкімді бол, ең бірінші,
Әйелге ана болған жарасады.

---