Берлин алынды

Көз жасын көлдей қылған талай елдің,
Сан жетпес жүректерге қайғы-шердің
Уын төккен,
Ордасы — жылан, шаян,—
Фашизмнен тазарды бүгін Берлин.
Қан ішкіш, қыртысымен жер жалмағыш
Тажалды жойған шақта жұртты арбағыш
Советтік теңдесі жоқ Армияға
Шаттықпен барлық халық айтты алғыс.
Бүгін дүние аузында бір ғана сөз:
Жер жүзін қанды саздан аршуға тез,
Уа, жеңісте теңі жоқ Совет ері,
Қалдығын фашистердің өлтіре ез!
Жер шары фашизмнен тазаруда,
Соғыстың қуанышын, азабын да
Бір керіп туысқан ел қатарында
Мақтанам, жүргеніне қазағым да!

1945

---