Көк Түрік абызының тілегі

Уа, құдiреттiң Құдiретi,
Көк тәңiрi,
Алдымен өзiңнен тiлеймiн.
Жерiме
Жылуы мен Нұрын құйған
Күн менен Айдан тiлеймiн,
Төбемде
Шатырлап жатқан
Жасын мен жайдан тiлеймiн,
Судан тiлеймiн,
Оттан тiлеймiн!
Елiме
Таулардың жасындай өмiр бер.
Ата-бабалардың
Аңсап өткен
Арман-шерiн бер,
Сертiнен таймайтын
Сенiм бер!
Айбынымыз асып тұрсын!
Кiмнiң болсын
Меселiн қайтарып,
Мысын басып тұрсын.
Төрт түлiк малымыз
Жерiмiзге сыймай
Жыртылып айырылсын.
Байлығымыздың
О шетiмен
Бұл шетiне жете алмай
Шаты жыртылып,
Мойны қайырылсын.
Еркектерiм
Көк тiреген емендей болсын,
Ақылдары
айдын көлдердегi
Тереңдей болсын!
Әйелдерiмiздiң
Саба мен местердей
Қарындары қампиып
Құрсағы кеппесiн.
Сұқ сөздiң сұғы,
Зымиян тiлдiң
Оғы өтпесiн.
Бiрлiгiмiз
Шаңырақ көтерiп тұрған
Қарағайдан иiлген
Уықтай болсын.
Сыйластығымыз
Бетiн жел сипамаған
Тұнықтай болсын.
Ұлдарымыз
Алшаң-алшаң жүретiн,
Балпаң-балпаң басатын,
Ханшалардың шымылдығын
Найзасының ұшымен ашатын,
Жолбарыстарды алып ұрып
Сүтiн iшетiн,
Сөйтiп шөлiн басатын, –
Арда болсын.
Түңлiгiмiздi
Қыдыр Ата қорғасын.
Тiрлiгiмiздi
Әулие-әмбиелер,
Қамбар ата,
Шопан ата,
Зеңгi баба,
Ойсылқара,
Сексек ата қолдасын!
Бiзге қас қылғандардың
шаңырақтары шартылдап
Босағалары партылдап сынсын.
Тәңiрiнiң өзi оларды
Тас төбелерiнен
Қос қолдап ұрсын.
Көк тәңiрi,
Тiлегiмдi қабыл ет!

---