Мақамбеттің тергеушіні алдағаны

Мақамбеттің үстінен тергеушіге арыз түседі. «Айыпкерді тексеруге кісі шығыпты, бүгін келді» дегенді естіп, Мақамбет атына мініп ауданға аттаныпты. Ауданнан шыққан тергеуші қарсы кездеседі. Тергеуші жөн сұрап:

— Қайдан келесіз? — десе:

— Шыққан жерім артымда қалды, — депті Мақамбет.

— Қайда бара жатырмыз?

— Баратын жерім алдымда.

— Деніңіз сау ма? — деп тергеуші ыза бола сөйлепті.

— Ауру болсам, атқа мініп осылай жүрем бе?

Тергеуші сөзге жарымайтын болған соң, өз жолымен жүріп кетіпті. Сонан алдындағы көрінген ауылға келіп:

— Мақамбет Шөжеев деген кісінің қайда екенін білесіздер ме? — деп сұрапты. Ауыл адамдары:

— Сізге жолда көзі қыли, қара сақалды кісі жолыққан жоқ па? — депті.

— Иә, жолықты.

— Ендеше іздеген Мақамбет Шөжеевіңіз сол кісі.

— Мақамбет ол болса, одан мен жауап ала алмаспын. Онан да әуре болмай ауданға жетейін, — деп тергеуші қайтып кетіпті.