Жаңылтпаштар

Маса жүрді ызылдап,
Маса қаны бұзылды-ақ...
Бір уақта шекесі
Қоя берді дызылдап.

---

«Латышқа бар қатыстығым,
Айтамын, - деп - латыш тілін»,
Айта алмай шатысты інім.

---

Қырда екі кекілік жетіліп келеді,
Екі кекілік секіріп-кекіріп келеді.

---

Қылқиып бала арыңтады,
Шалдығып шал арықтады.
Көздері аларып тағы...
Қорада мал арықтады.

---

Қызыл сиялы қалам сенде,
Көк сиялы қалам менде.
Қызыл сиялы ол алты теңге,
Көк сиялысы ол жарты теңге.

---

Құман от ңасында,
Жүген ат басында.
От басынан құманды алыс тастасын ба?
Ат басынан жүгенін ап, ноқта салсын ба?

---

Құлын-тай шығады,
Тай-құнан шығады.
Кейде тай
Құнанға сай шығады!

---

Құлақтандырмағандықтарыңыздан
Бара алмай қалдық бәріміз де аңға.

---

Қойым семіз бе?
Ешкім семіз бе?
Қойым тоғыз ба?
Ешкім сегіз бе?

---

Қойбағар тойға бармай, қойға барды,
Тойбағар қойға бармай, тойға барды.

---

Қасқыр - ит,
Тісін ақситты.
Жақсы ит тісін ақситпады.

---

Қаршыға ма,
Құмай ма?
Әнші балаға қаршыға ұнай ма?
Малшы балаға құмай ұнай ма?

---

Қарашы қиырға,
Көрінген сиыр ма?
Ұқсай ма сиырға,
Ұқсай ма суырға,
Айыру қиын ба?

---

Қараңдаршы қанағатты!
Қара лақты қамамапты.
Қамқорлықпен қарамапты,
Қаңғыртыпты қаралақты.

---

Қарақат терген рахат па?
Тұра қап қарақат жеген рахат па?
Тауықтар да қарақатқа құмар ма?
Тарысы бар ала қап та ұнар ма?

---

Қара бояу да,
Ақ бояу да бар менде.
Қара бояулар
Ақ бояудан кем бе?

---

Қапты ап, мақта ап,
Мақта қапталап,
Қақтап аптап,
Теріміз ақты-ақ.

---

Қаңбақ-тоңғақ!
Тоңғақ-қаңбақ
Ұшты иық қомдап!

---

Қазықты тоқпақпен тоқпақтағанда
Тоқпақты тоқтатпай тоқпақта.

---

Кінә бар,
Күнә бар,
Күмән бар.
Кінә не,
Күнә не?
Күмән не?
Кінәні артады,
Күнәге батады.
Күмән боп жатады.
Кінәлі, күнәлі,
Күнәлі күмәнді,
Күмәнді кінәлі.

---