Түркістан — Гүлстан – Ғафу Қайырбеков

Бір гүл келіп көкірегіме орнаса,
Бір гүл келіп галстугін байласа,
Бір гүл келіп мойыныма асылып,
Самал болып, шашым сипап ойнаса,
Енді қалай қынжылмассың сен оған
Түркістанды Гүлстан деп қоймаса?!
Бір гүл келіп салтанатты сән кеште,
Салса шырқап сен сүйетін әнді еске.
Бір гүл келіп сусын беріп қолымен,
Бір гүл келіп көрік болса кеңеске,
Қайран ақын, қалай дәтің шыдайды
Түркістанды Гүлстаным демеске!
Алыс туыс, жомарт бауыр, ел ішім,
Қолымда асың, аузымда жемісің
Құлағымда жақсы сөзің, әзілің
Өзің болдың бір керемет мен үшін.
Қарт Түркістан, жас Гүлстан, Нұрстан
Дәл өзіңдей біз жасармыз жер үстін.