Маржанкөл вальсі

Ешқайдан таптырмайтын құтты бұл жер,
Ағайын арнап келіп көзіңмен көр.
Қартадан қарасаңыз әдейі іздеп,
Әйгілі Сарыарқада тұр Маржанкөл.
Маржанкөл шөбің шүйгін мамықтайын,
Таңдайды тамсандырған қымыз майың.
Жарасқан айдынында аққу, қаздай,
Қасенбай, Құрқопамен, Уызбайың.

Қайырмасы:
Жүректе жүрген дәйім,
Атыңнан айналайын.
Жаны жайсаң дархан елім,
Мамыражай Маржанкөлім.

Отырсам ойым толқып түседі еске,
Ақ бесік, ала жібің тұсау кескен.
Ұл-қызың, бір ұлыс ел, ұлы көште,
Бір үйдің баласындай өзіңде өскен.
Ақ бата, қабыл болып тілектерің,
Қияға қонақтаған түлектерің,
Сағынса балалық шақ балғын кезін,
Соғады Маржанкөл деп жүректері.

Қайырмасы

---