Өлең, жыр, ақындар

Тумақ, өлмек – тағдырдың шын қазасы...

  • 15.04.2015
  • 1
  • 1
  • 19453
Тумақ, өлмек – тағдырдың шын қазасы,
Ортасы – өмiр, жоқтық қой екi басы.
Сағымдай екi жоқтық арасында
Тiршiлiк деп аталар бiраз жасы.

Жоқтық, барлық, жоғалмақ – араласы,
Үш ерiксiз болады мағынасы.
Нажағайдай жарқ етiп өшпек болса,
Өмiрдiң он тиындық жоқ бағасы.

Патса, батыр, бай, бағлан, ел ағасы,
Өнерпаз, ойшыл, бiлгiш, ғұламасы.
Мақтанып жердiң жүзiн жалмаса да,
Кәрiлiк пен өлiмге жоқ дауасы.

Ендi өмiрдiң қызықты қай арасы,
Өлiмдi ойлап сiңе ме iшкен асы?
Оны ұмытып, өлместей өзеленер,
Әлi тiрi жүргендей түп атасы.

Адамзат – айуанның арам, насы‚
Жанның да, ақылдың да дұспандасы.
Жанды сурет сияқты қуыршақ боп,
Жаралыстың ойнаған тамашасы.

Менменсiнген кердеңнiң керген қасы,
Iшiмдi күйдiредi сол ызасы.
Жер тәңiрсiп, кiсiмсiп желiксе де,
Төбесiнен бiр түсер жайдың тасы.

Өмiрдiң өкiнбейтiн бар айласы,
Ол айла – қиянатсыз ой тазасы.
Мейiрiм, ынсап, әдiлет, адал еңбек,
Таза жүрек‚ тату дос – сол шарасы.



Пікірлер (1)

Пікір қалдырыңыз

Арман

  • 1
  • 3

Жаз шығып, жаманшылық жоғалғанда,
Тал гүлдеп, шалғын өсіп, оңалғанда.
Көлбеңдеп көкорайда күрілдетіп,
Орақшы пішен шауып шөп алғанда.

Толық

Бәйшешек бақшасы

  • 1
  • 2


Жемiстi, жақсы иiстi бұл бәйшешек,
Аралайық, пайдасын көрем десек.
Ұғымды, милы жастың ойын қозғап,
Ұқтырар талай тәлiм, талай есеп.

Толық

Қорқыттың сарыны

  • 1
  • 2

Кешегi кеткен Ер Қорқыт
Кейiнгi жанға болды ұмыт‚
Сарынын соның салайын,
Ескi әуез демей құлақ тұт.

Толық

Қарап көріңіз