Мал өсірген аймаққа

Төрт түлікті өсірген,
Тұнық суды кешірген,
Колхоздағы ерлерім!
Құтты болсын съезге
Басты қосып келгенің;
Малды өсірген, өргізген,
Шалғынды шалып жегізген,
Малға жайлау жайнатқан,
Тау бауырын жайлатқан,
Құлындатып биені,
Боталатып түйені,
Мыңғыртқан малды елім бар
Біздің алтын аймақтан!
Төрт түліктің тұяғы
Жерді шарлап із өткен.
Шабандарым асқарда
Жегізбей малды қасқырға,
Күні, түні күзеткен!
Ай мүйізді сиыры
Желінінен сүт аққан,
Тау өркешті аруана
Ағылған шар тараптан;
Күңгір-күңгір кісінеген
Алтын жалды арғымақ,
Шапса жерді қуырған,
Ескен желдей ағындап,
Қой қозысы құландай,
Ешкісі бөрте бұландай,
Колхозда өскен түлігім
Жайылған қаптап табындап,
Малым тұрсын жерімнің
Меруерт болды әр тасы!
Бағы қонған елімнің,
Құлпырған мынау жерімнің,
Отаным құрыш қалқасы!
Малыма шөп болатын
Шалғыны шалқар көлімнің,
Алтын дәні аймақты
Аялаған елімнің,
Күнім менен көгімнің,
Жаннат болған жерімнің,
Себебін халқым сұрасаң,
Сталиннің арқасы!
Немерем, ұлым, балаларым,
Өсе берсін малдарың!
Малға қастық қылатын
Құрт Отанның жауларын!
Қой үстіне боз торғай
Жұмыртқалап ән шырқай,
Тұрған кезде қарт Жамбыл
Секілденіп дәл бұлбұл,
Сталиннің атына
Жырлаған, жырлайд жырларын!

---