Директорлар қызметтерiнен бас тартты

Тамыздың басында абақтыдан үйiне шығарылған Әкiмгерей Көшербаевтың iсi iрi көлемде пара алғаннан “алаяқтық” бабына ауыстырылды. Қылмыстық iс үш мектеп басшысының арызы негiзiнде қозғалды. Шалқар ауданындағы Қауылжыр бастауыш мектебi директоры мiндетiн атқарушы Ботагөз Әбдiғалиева пара беру жолдарын жасырмай жайып салды. Әбдiғалиева параны тiкелей Көшербаевқа ұстатпаған, 150 мың теңгенi облыстағы бiлiм саласына қатысты басқа адамдарға берген. 2015 жылдың 6-9 қазанында Қауылжыр бастауыш мектебiнде жоспарлы тексерiс өтетiнi туралы аудандық бiлiм бөлiмiнен хат түскенде, Әбдiғалиеваға туған шешесi көмек сұрап, Әйтеке би аудандық бiлiм бөлiмiнiң қызметкерi Раиса Игiбаеваға хабарласқан. Сәлден соң Раиса Игiбаеваның өзi шығып, аттестациядан сәттi өту үшiн департамент директоры 200 мың теңге сұрағанын жеткiзген. Ботагөз Әбдiғалиева 150 мың теңгесiмен Ақтөбеге келiп, Раиса Игiбаеваға қоңырау шалып, Игiбаева СМС арқылы Лидия Шайғазықызы Оралбаеваның ұялы телефонын жазып жiбередi. Сол жерде қаладағы сауда орталықтарының бiрiнде Ботагөз директор Лида апайының қолына 150 мың теңге ұстатып, аттестациядан өтуге кепiлдiк алған. Ботагөз Әбдiғалиева ауылына қайтар жолда “Раиса апайдың (Игiбаева) Көшербаевтың үстiнен құқық қорғау меке­месiне арыз жаз деп тапсырма алғанын сотта айтты. Сол жерде Қауылжырдың директоры Раиса апайының айтқанын бұлжытпай орындап, Жемқорлыққа қарсы күрес бюросының жергiлiктi кеңсесiне өз аяғымен келiп, Кө­шербаевқа пара бердiм деп арыз қалдырған.

Тергеу материалдарында   2015 жылдың 12 қазанында 150 мың теңге берiлдi деп тiркелсе де, сотта Жемқорлыққа қарсы қызметтiң тергеушiлерi – Н.Жекеев пен А.Мұхамбетжанов   Ә.Көшербаевтың Б.Әбдiғалиева­дан тiкелей пара алып жатқанын көрсететiн бейне, дыбыс жазбаларын дәлел ете алмады.

Ә.Көшербаевтың пара алғаны туралы арыз жазғандардың бiрi –Қарғалы ауданы Қосестек орта мектебiнiң оқу iсi жөнiндегi орынбасары. 2016 жылдың қаңтарында Қосестек орта мектебi аттестациядан өтетiнi белгiлi бол­ғанда,  мектептiң оқу iсi жөнiн­дегi орынбасары Еңсепова дегеннен 500 мың теңге қажет екенiн бiледi. Аяқ астынан бұл орынбасар 500 мың теңгенi жинай қояды (сотта мектеп басшылары ақшаны өзiмiз жинадық деп, мұғалiмдерiне шаң жуытпайды). 17 қаңтарда Ақтөбедегi темiр жол вокзалының жанында Қосестек мектебiнiң орынбасары Еңсеповаға әлгi соманы ұстатқан. Тергеу iсiнде Еңсепованың 500 мыңды бiлiм саласын бақылау департаментiнiң орынбасары – Мұхамбеталлинаға бергенi жазыл­ған. Әкiмгерей Көшербаевтың қарамағындағы қызмет­керi ақшаны алғасын Раиса Игiбаева­ға қоңырау шалған. Еңсепова кiм, оның аттестациялауға қандай қатысы бар? Игiбаева 500 мыңның 50 мыңын өзi алып, қалған 450 мыңын баласына Лидия Оралбаеваға апарып бер деп тапсырып, қаладан кетiп қалады. Еңсеповаға 500 мың ұстатқан Қосестектiң оқу iсi жөнiндегi орынбасары Қауылжыр директорының iсiн қайталап, үйiне қайтпас бұрын Жемқорлыққа қарсы күрес бюросына Көшербаевты пара алды деп арыз қалдырып кетедi.

Әйтеке би ауданы бiлiм бөлi­мi­нiң қызметкерi Раиса Игiбаева, бiлiм қызметкерлерiнiң қалалық кәсiподағы басшысы Лидия Шайғазықызы Оралбаеваның есiмдерi ыңғайсыз жағдайда сотта аталуда. Мектеп басшылары мен орынбасарлар бiлiм саласына тiкелей қатысты осы тұлғаларға ақша берiп келген­дiгiн айтып, сотта куәлiк еттi. Аттестациядан өту бағасы да әртүрлi: бала саны өте аз ықшам мектептерге 200 мың теңге, орта мектептерге 500 мың теңге.

Қалалық бiлiм бөлiмiнiң осы жылдың наурызындағы дерегiне қарағанда, 2016 жылы Ақтөбедегi 15 бiлiм орындарын жоспарлы тексерiстен өткiзу жоспарланған. № 18, 5, 17, 19 мектептер аттестациядан өте алмады. Себебi, 11 сыныптағылар өте төмен балл көрсеткен. Мектеп ұжымы балалардың бiлiмiн көтеру жолдарын iздеудiң орнына осындай лас тiрлiктерге барған. Сөйтiп, Ақтөбе облысының бiлiм саласы сыбайлас жемқорлықтың нағыз ұясына айналған. Егерде, Жем­қорлыққа қарсы күрес бюросының тергеушiлерi бiлiм бақылау департаментiнiң бастығы Әкiм­герей Көшербаевтың пара алғанына дәлелдер келтiре алмаса, онда соншама ақша кiмнiң қалтасына түскен? Егер Көшербаев қандайда бiр ойындардың құрбаны болса, онда оған тапсырыс берушi кiм? Осы жағы әлi күнге дейiн жұмбақ. Сот әлi жал­ғасып жатыр. Байқауымызша, мектеп директорларының орындарын тастай қашқан дүрбелеңi мен Көшербаевтың соты арасындай әлдебiр байланыс бар секiлдi.