Анаға арнау – Дәурен Қуанышев

Бар өмірі байланысқан баламенен,
Ана деген – бір бөлек ғажап әлем.
Кім бар сенің жаныңнан артық десе,
Ойланбастан, ол – менің Анам дер ем!

Бар әлем құлпырады анаменен,
Өмірін тоғыстырған даламенен.
Аяла бойыңдағы пәк сезіммен,
Аяла асылыңды Ана деген.

Уа,аналар,ғажайып,көркемсіздер.
Тірліктің шыжығын көп көргенсіздер.
Аналардан Пайғамбар шықпаса да,
Пайғамбарды әкелген сіздерсіздер.

Ұрпаққа бар нәріңді бергенсіздер.
Қиындыққа мойымай төзгенсіздер.
Шежіреде аттарыңыз жоқ болса да,
Шежірені таратқан Сіздерсіздер.

Ұрпақ үшін қашан да алаңдайсың,
Анасыз бұл жалғанда бағаң қайсы?!
Жер бетінен жәннатты іздесең де,
Ананың құшағындай таба алмайсың!

Ұрпақ үшін сан мәрте тас түйінген,
Анаңды бауырыңа бас мейірмен.
Асқардан асса-дағы мейманаңыз,
Аналардың алдында бас иіңдер!