Жазираға он бес жас

Аталардың, жарықтық мақалдары –
Дәл жүрекке, дөп тиіп, жатар бәрі.
Ересектік өмірге қадам бастың
Есте болсын осындай қатер бары.
Жаным балам, тыңда енді, саған айтам,
Жеттің міне, он беске, қазақ айтқан.
Сөздің мәнін есті адам түсінеді,
Жүрісіңнен жоқ екен сағым қайтқан.
Қарасы да, көзімнің ағы да өзің,
Жасық болсам, жан балам, сынар кезім.
Тән жарасы жазылар, жазылмаса
Тәуекелді табармын, шыдам, төзім.
Кезі еді әкеңнің тау құлатар,
Ойран етер ордасын, жау жылатар.
Кім ойлаған дертті боп осы жаста
Қайғы менен көзіңді жаудыратар…
Құтты болсын, ақ ботам, арман жасың,
Осы күннен жаңа өмір жалғар басын.
Осы күннен Кісілік даңғылы да,
Өз ойыңмен биікке самғар жасың.