Сен туған жер – Гүлжауһар Сейітжан

Сен туған жер,
Біліп қой,
Ұлылықтың отаны,
Қойны толы қазына,
Қойға толы қотаны.
Мұнда бәрі бар, жаным,
Құм мен шалқар теңіз де,
Ұшқыр машиналар да,
Аруана да боталы...
Қиырына жүгіртсең көзің талып,
Шаршаған,
Болса деймін мен соның мерей нұры тән саған.
Туған жерің – әсем бақ,
Құм белдеулі көк айдын,
Бір жағында мұнайдың мұнарасы самсаған...
Сен туған жер ғажайып,
Ұлы істердің аймағы,
Махаббат пен достықтың,
Игіліктің қайнары.
Бұл арада тоғысқан барлық ізгі тілектер
Бейбіт сүйгіш жердегі,
Марстағы,
Айдағы...
Мәртебесі жоғары,
Мерейі үстем елденсің,
Оған қандай жақсылық бұл дүниеде тең келсін...
Абай,
Абылай,
Абылдар
Туы болған халқының,
Ғажап елде, боташым,
Сен дүниеге келгенсің...
Қандай елде,
Қай шақта туғаныңды біліп қой,
Басталады дәл содан сындарлы сөз,
Білікті ой.
Сенікіндей елі мен жері бардың қашан да,
Көкірегінен ізгі арман көтереді күліп бой.
Сол арманың сені ылғи жетелесін алға шын,
Тілегіңді үмітке,
Өр мақсатқа жалғасын.
Туған жердей қастерлі,
Туған елдей мерейлі,
Қымбат шақтар толтырсын ғұмырыңның арнасын...