Бақыт құсы

Кеткісі келмей жүр-ау бақыт менен.
Гүлзардағы құс па екен бақыт деген?
Құм сағаттан құм сусып төгіледі,
Бірге ілесіп барамыз уақытпенен.
Қысыңа да шыдағам, болып көктем.
Күзіңде де күрсінгем, оңып кеткен.
Бақыт құсы оралар, сезіп жүрмін,
Бір кездері басыма қонып кеткен.
Орындалар түбінде тілекті үміт.
Әрдайым жүретінмін білек түріп.
Адамдықтың жолы үшін серт еткенмін,
Анамның кесенесін тіреп тұрып.
Тағдырым ай,
Арпалыс, соны ұқтырған.
Өткінші өкінішпен жолықтырған.
Бақыттымын,бағымдай аялайын,
Бақыт құсын басымда қонып тұрған.

---