Періштесің жүрекке сыр тұндырған

Періштесің жүрекке сыр тұндырған,
Асқан бақыт табылмас шіркін, бұдан.
Ғашық еттің мәңгілік жанарыңа,
Ішімде – күй, шалқыған сыртымда да – ән.
Көгершінім, кеудемде қанат қақтың,
Ұя салдың, жанымнан тағат таптың.
Сен мұңайсаң, қаламын мен күрсініп,
Қимылыңды қалт еткен санап бақтым.
Қарай берем көзіңе мөлдіреген,
Сағымдай ғой желегің желбіреген.
Көңіл – елік, кетеді желдей есіп,
Жазылмаған, қалқам-ау, сен – бір өлең.

---