Ұзақ күннің батырдым тағы бірін – Қуаныш Оспан

(ІІ)

Ұзақ күннің батырдым тағы бірін,
Ойларымның сен жайлы бәрі бүгін.
Ертең тағы ойлаймын жалғыз сені,
Солай тағы өтеді ары күнім.

Кетіппін ғой, айтпақшы, түнді ұмытып,
(Сағат тілі уақытты тұрды үгітіп).
Отырмын ғой білесің, ал, сен айтшы,
Елеңдейсің, ерке қыз, кімді күтіп?!

Шам да жақпай, кетер деп түнім қашып,
Күткен кезде қасыма мұңым да асық.
Сезді ме екен сен жайлы ойларымды,
Жақындады жұлдыздар жымыңдасып.

Жұлдыздарға көрсетсем құрметімді,
Жөн көрмейді олар да құр кетуді.
Бір шоғы - қас, бір шоғы- көзің болып,
Сенің сала бастайды суретіңді.

Дәл келтіріп ернің мен мұрыныңды,
Айнытпайды тіпті ерке қылығыңды.
Бірнешеуі әнеки шолпың болып,
Түнге қосып өреді бұрымыңды.

Түнгі аспаным әп сәтте мың құбылып,
Сұлулыққа бас иді құлдық ұрып.
Сұлу АЙды жетелеп қос қолынан,
Бір шоқ жұлдыз келеді зыр жүгіріп.

Қалқатайым күткенім осы менің,
Таң келеді дегендей "өшіремін"
АЙды алқа қып тағынған суретіңді,
Асығыс дәптеріме көшіремін...

27.05.16