Карпат ауасы – Тұрсынхан Әбдірахманова

Назар баурап көп кезден келген алқап,
Тотияйын торқалы жасыл Карпат,
Көз суарып көркіне орныққандай
Алау көңіл басылды құмар тарқап.
Тау да таңсық емес-ті орман дағы,
Ел қазақтың жетерлік орман, бағы.
Әсем Карпат аңыз боп бізге жетіп,
Ауасымен баураған болған шағы.
Яремчаның туристік базасында,
Серуендеген адамдар арасында
Жүріп орман ішінде оттегіне
Мас боп біреу қалыпты нанасың ба!
Басшылары базаның етіп қауып,
Әрбір саққа жүгіріп, ойлар ауып...
Аяғынан тік тұрып күллі турист,
Үш күн іздеп алыпты әрең тауып.
Тапқан жерде ол ұйқының құшағында
Депті оранып, маужырап нұр сағымға:
Бекер ояттыңдар-ау дәл осылай
Көрмеп едім тынығып бұл шағымда.
Мұндай-мұндай жағдайлар көп-ақ екен,
Алла ерекше жаратқан жаннат мекен,
Адамдарға бұйырған несібе боп,
Сол адамдар қолынан тозбаса екен.