Қазақ жастарының ұраны – Тұрсынхан Әбдірахманова

Біз қазақтың жалынды ұланымыз,
Елге қорған, ертеңгі бұланымыз.
Тәуелсіз де өркенді жас жолбарыс
Отан құрған ер болу ұранымыз.
Қамалмайтын қараңғы, қапас торға,
Сөнбес шырақ маздаған біздің жолда!
Алар асу, қонар шың, бағыт айқын,
Болашақтың аламыз кілтін қолға!
Көтереміз жоғары елдік туын,
Жайқалтамыз жаңа, жас ғылым нуын!
Кәусар бұлақ халыққа көзін ашып,
Сусындайтын етеміз келер буын!
Өркенділік бүгіннің талмас әні,
Шоқан, Абай арманы алға асады.
Тылсымдардың талайғы сырын ашқан
Әл-Фараби салған із жалғасады!
Хас болаттай қайраулы жігеріміз,
Барыс болып басамыз ілгері біз!
Өркенді елдер болашақ көшін бастап,
Дейміз бүкіл әлемге «Бізге еріңіз!»