Бір досым бар

Бір досым бар,
Аңғал өзі, аңқылдақ,
Күтіп алар барсам мені жалпылдап.
Бір досым бар,
Мені елге сөз етер,
Өз ісіне, өзі күлер қарқылдап.

Бір досым бар,
Ұяң өзі тартыншақ,
Желмен бірге, ұшып кетердей қалбыршақ.
Бір досым бар,
Ойнап күліп бірге өскен,
Оныменен қызықты еді балғыншақ.

Бір досым бар,
Адамзатты сүйетін,
Махаббатқа шыдап төзіп күйетін.
Бір досым бар,
Тұрақсыздау көңілі,
Бірде байлық, бірде мансап сүйетін.

Бір досым бар,
Ең жақыны көретін,
Аш қалғанда, нанды бірге бөлетін.
Бір досым бар,
Әркез мені қолдайтын,
Биіктерге шығарыма сенетін.

Бір досым бар,
Бет пердемен танылған,
Сынақ келсе, құлай кетіп жалынған.
Бір досым бар,
Ойын ойнап азатын,
Құмар ойын атауымен салынған.

Бір досым бар,
Шекпейтінде ішпейтін,
Басты байлық білім және күш дейтін.
Бір досым бар,
Күші асқан толағай,
Адамдарды менсінбейтін, піш дейтін.

Бір досым бар,
Иман жүзді, арайлы,
Болашаққа сенімменен қарайды.
Бір досым бар,
Билікке тым жақындау,
Керек етсе табанында жалайды.

Бір досым бар,
Бір досым бар ағайын,
Қалай оны есіркемей қалайын?
Мен дегенде жанын берер досым бар,
Жалған достың көріп жүрміз талайын.

---