Әйел мен еркек – Фариза Оңғарсынова

(аударма)

- Бұл кім болды екен?
- Еркек пен әйел.
Тирео де Мулина

Егер олар көшеде
бара жатса,
жүздерінен бақыттың нұры атылып,
еш жүректен шықпаған жыр атылып,
тек екеуі бардай бой жүрсе әлемде,
шулы көше қалады бұ да тынып.
Кетеді сосын ән болып аспан-әлем,
қу бұтадан тұрғандай гүл атылып.
Иесіз үй де көрінер жалт-жұлт етіп,
бос тұратын қаңырап мұңға тұнып.
Егер олар көшеде еркін самғап
үнсіз ұғып бір-бірін бара жатса,
өсекші де, кезбе де, кемпір-шал да
жалт бұрылып сүйсіне қарамас па!
Шарасы жоқ ешкімнің бұл заманда
мына мөлдір сезімге қарамасқа.
Өйткені бұл - махаббат,
аһ ұрғызып біреуді күрсіндірген,
(мен де сол бір қайғыдан үнсіз жүрем).
Көлгірсіген сайқал бір сезімділер -
адам емес хайуан - құнсыз кілең.
Ол екеуін көргенде:
бұлтты аспанды нүр-шапақ торлады да,
аяқ басты дүние оң жағына.

РОБЕРТО ФЕРНАНДЕС РЕТАМАР