Қоштасып талай доспен – Фариза Оңғарсынова

Қоштасып талай доспен
қайғының таттым дәмін.
Көңілімнен арай көшкен
дос көріп жаттың бәрін.
Аңдысар, сөз санасар,
көрсетіп күш, салмағын,
қастасқан достан асар
болмайды дұшпандарың.
Ақыл-су, шақша – басым,
сынасып сыр алардай:
сезбеймін ақ-қарасын,
жақсылап құлап алмай.
Жылаймын сосын тұрып,
шайнаймын бармағымды.
Кеудемде өшім тұнып,
барлаймын жан-жағымды.
Кеуде – ыза, көзімде – кек,
өкінем, тым жүдеймін.
Бар кінә өзімде деп
жанымды тілгілеймін.
Бел буам бұл жайды енді
кешпеуге өмірімде.
Ал, оның, жырдай мәңгі
менімен жолы бірге.
1984