Менің пірім, тірегім, тұғырым да – Фариза Оңғарсынова

Менің пірім, тірегім, тұғырым да,
әшекейлі алқам да, бұрымым да,
қолдаушым да – жалғыз-ақ елім менің,
қастерлімнің бәрі бар бұл ұғымда.
Елдің сезім, сенімі…
Ғұмырда ешкім
қосып жеткізе алмайды мұны жырға.
Бұл ұғымда – қуатым, ғажап әнім,
күнге ұқсаған ып-ыстық таба наным;
бауырлардың сезімі, сенімдері
менің қамымды ойлайтын сан ағаның;
ел-дегенім – самалды Саумалкөлім,
тұнығында жүземін, таранамын.
Өз-өзімнен кей сәтте түңілемін,
мен дегенде бұзардай Күн реңін,
үйреніп ап «Мен жақсы» ариясын,
сұңқыл қағып шырқаймын мұны керім;
ұқпай қайдан жақсы боп туғанымды,
сіңірмесе бойыма нұрын елім;
сіңірмесе қаныма жақсылығын,
жайсаңдығын, тәтті әнін, ащы жырын;
көкірегіме кеңдігін сыйғызбасам,
қасиетке менің де тапшылығым!
Сенсіз биік қиялар қиял ғана,
менің асқақ діңгегім, бас тұғырым!
1982