Сұңқар ғана сұңқарға серік болар – Фариза Оңғарсынова

Сұңқар ғана сұңқарға серік болар,
сонысымен сенімді, көрікті олар.
Бұл жалғанда қарға да қарғалармен
өлімтікке жапырлай келіп қонар.
Адамдар аз салатын арқаны кең,
пенделіктің шырмалып арқанымен,
қайтсем қолға билікті аламын деп,
өңешінен жұтқаны – жаңқа кілең.
Билік тимей жүргені – зәрлі, ашулы,
тырналардан өш алар қарға сынды
өңшең тобыр жиылып, бір-бірінің
жағасына қол салып, жармасулы.
Өмір кейде өзендей арнасы улы,
таба алмайсың нәр болар жанға суды.
Бір-бірінің қимылын аңдып, бағып,
топ-тобымен өзара арбасулы.
Бір-бірінен қызғанған Айдың нұрын
орталарда күн кешкен қайғымды ұғын.
Әлде түлкі тегіміз болғасын ба,
адамдардан естірек маймыл бүгін.
Сусыз жерде тамырлар семер де анық,
баса алмаудан шөлімді келем налып.
Озбырлар да, зұлым да жаза тартпас,
барлық тақсыреттерін шегер халық.
1983