Шықпайды деп ойлама жастан дана

Шықпайды деп ойлама жастан дана,
кәрі-жасы болмайтын тастар ғана.
Миы да жоқ, ойы жоқ шалдар қанша
басын бұлдар орап ап ақ шалмаға.
Ұқсап соғыс жылдағы басқармаға,
ел сыйлайды екен деп аспандама.
Ел сыйлайды сатусыз, құн дәметпей
мейіріміңді сен оған шашсаң ғана.
Қасиетті болса адам, асқан дана,
"Мен - әулие, - демейді, - жастар – бала".
Дана болсаң, басыңды и ұлылыққа,
мынау үлкен-кіші деп жас таңдама!
1993

---