Олимпиада – Лондоннан сүйінші елім!

Лондонда ізім сайрап, жолым қалды,
Лондонда мен отырған төрім бар-ды,
Олимпиада – Лондоннан сүйінші Елім,
Екі мәрте Елұран орындалды!..
Көз жетті Ұлы Британ Лондонында,
Даламның дарындары молдығына,
Өлеңмен сүйіншіні мен берейін,
Қазақтың қос алтыны қоржынында!..
Алатауым толғанған алаңдамай,
Тебіренбей жата алар далам қалай?!
Үш алтын алам деген Талғат баурым,
Біз бастық екі қадам соған қарай!..
Тебірентер күн алда енді көкті,
Аянбай Қазақ үшін терді төкті,
Александр Виокуров айналайын,
Қазақтың Туын көкке желбіретті!..
Лондонға бекер келіп, бекер келмей,
Парызы туған жерге өтелгендей,
Еліктің асығындай Зұлфиямыз,
Алатаудың бір шыңын көтергендей!..
Жаралған жүрегіммен, бар ауылмен,
Кеудемдегі ең ыстық жалауыммен,
Лондонның көпірінен қарсы алып ем,
Осы бір Олимпиада алауын мен!..
Қазақы былай қойып қалжыңдарды,
Әр істе Қазақ деген мазмұн бар-ды.
Бәрі де бұл өмірдің бекер емес,
Елу Ел қатарына – аз күн қалды!..
Тарихқа айналуда қас-қағымдар,
Алатаудай ең биік асқарым бар,
ОЛИМПИАДА – ЛОНДОННЫҢ құшағында,
Өнерін көрсетуде жас дарындар!..
Әр үйі бір-бір тарих, ғажап еді,
Лондонның таза нұры, таза желі,
Қазақ қазақ болғалы, ағайындар!..
Олимпиада – Лондонда Қазақ Елі!!!

29 шілде 2012 жыл