***

Күмбірлетсе жаңбыр күйін,
Күңіренген кеудем әр күз.
Билеп жүрміз тағдыр биін,
Кейде жұп боп, кейде жалғыз.

Мұң дегенің тасқа да тән,
Мұң ақынға, гүлге тән іс.
Қайда сонау асқақ адам,
Бірде бөтен, бірде таныс?

Қояр едім Күнге сұрақ,
Жолдар едім Айға сауал.
Бірде жақын, бірде жырақ,
Сенген жандар қайда солар?

Қолда қалам, қолда парақ,
Ойларыммен болам араз.
Өмір неге жолдама хат,
Өлім неге қара қағаз?

Күмбірлетсе жаңбыр күйін,
Күңіренген кеудем әр күз.
Билеп жүрміз тағдыр биін,
Кейде жұп боп, кейде жалғыз.
Көбіне жалғызбыз…

---