Қандай әсем жер беті!

Алуан бояу баулары,
Аппақ басты таулары,
Аң мен құстың қорғаны,
Жасыл жайлау орманы,
Түрлі түсті келбеті,
Қандай әсем жер беті!

Қырмызы гүл қырлары,
Сары алтындай құмдары.
Бозғылт селеу белдері,
Көкшіл мөлдір көлдері.
Түрлі түсті келбеті,
Қандай әсем жер беті!

Сұрғылт шағыл шөлдері,
Бұйра сағым өңдері.
Жаралғандай о бастан
Алып кемпірқосақтан,
Түрлі түсті келбеті,
Қандай әсем жер беті!

---