Жануарлар суды қалай iшедi?

Жылқы
- Жан-жағына елеңдеп,
Үзiп-үзiп iшедi.
Тұнық суға тереңдеп,
Жүзiп-жүзiп iшедi.
Себебi не сондағы?
- Тым талғампаз болғаны.

Қой
- Бас алмастан сiмiрiп,
Демде қанып алады.
Томпаң-томпаң жүгiрiп,
Өрiске ұзап барады.
Себебi не сондағы?
- Адал, момын болғаны.

Түйе
- Ұзын мойнын қашыққа
Бұрып тұрып iшедi.
Асық, мейлiң, асықпа,
Тұрып-тұрып iшедi.
Себебi не сондағы?
- Сабырлы, нық болғаны.

Ешкi
- Қойларменен таласып,
Иықтасып iшедi.
Әркiмге бiр жанасып,
Тиiп-қашып iшедi.
Себебi не сондағы?
- Ұшып-қонба болғаны.

Сиыр
- Қара мұның айласын,
Байқап-байқап iшедi.
Шаңырақ мүйiз дәу басын
Шайқап-шайқап iшедi.
Себебi не сондағы?
- Сәл мазаңдау болғаны.

Ит
- Шашыратып, шығындап,
Жалап-жалап iшедi.
Жан-жағына ырылдап,
Қарап-қарап iшедi.
Себебi не сондағы?
- Тым қызғаншақ болғаны.

Мысық
- Көзiн жұмып көлгiрсiп,
Жалап-жалап iшедi.
Бәрiн өзi бiлгiрсiп,
Санап-санап iшедi.
Себебi не сондағы?
- Сонша сараң болғаны.