Саянға жырдан шашуым – KAZBEKboken63

Саянға жырдан шашуым

Қайғысыз ешбір адам қартаймайды, Мұң-зардан көңіл қалай ортаймайды? Қызық көрмей өмірден ерте озған, Еске алам бауырым Алтайбайды.

Жігіттің қайсар мінез серісі еді, Сол Алтайдың Саяным жемісі еді. Құлының ізді басқан жігіт болды, Қолдап жатсаң тірлігі келіседі.

Өмірлік басыңдағы бағын болған, Аяла, аққуыңды көлге қонған! Күндер тусын қос ғашық бастарыңа, Ақ отауға он шақты бала толған.

Ешкімді қиянатқа қимаңыздар, Ақ сүт берген ананы сыйлаңыздар. Жыл сайын шілдехана, қуанышқа, Туған-туыс, достарды жинаңыздар.

Ешқашан жамандыққа қарамаңдар, Тек қана жақсылықты жағалаңдар. Бір арнада тоғысып жүректерің, Бір-біріңді қадірлеп, бағалаңдар.

Шаңырақты шаттық әні кернесін, Екеуіне пәле-жала ермесін. Жаратушым өзі қолдап сендерді, Қасірет пен уайымын бермесін.

Ақша қардай жауып жатыр ақ тілек, Халқым отыр екі жасқа бақ тілеп. Жарқылдап жүр құдалар мен құдағи Бақыт шамын Саян балам жақты деп.

Құйып беріп сүт, айран, көжелерің, Аман болсын ақ шашты әжелерің. Қуаныштан күлімдеп жүрсін әр кез, Арасында шөпшек пен шөберенің.

19.01.2013ж. Қарағанды қаласы