Бұйырмаған бақыт – Оразбай Сарыбаев

Білмеймін,
Жасқандым ба жүрегіңнен,
Шыға алмай үнсіздіктің
Тереңінен.
Ентігіп бара жатыр
Көңіл құрғыр,
Қиын-ау, айтылмаса
Сезім деген.

Жұлқынып,
Бұлқынсам да тынып демім,
Барады ішімді өртеп
Күйік шерім.
Айтқым кеп тұрса-дағы
Ұнатам деп,
Жеңілдім өзімнен мен
Жетпей сенім.

Тағдырға
Жазылар ма сендей теңім?
Көркің сенің
Күннен сұлу,
Айдан керім.
Сүйдірер мені бір жан
Дәл өзіңдей,
Бірақ мен сені ғана
Шын сүйемін.

Демеймін
Жолымыз ешбір тоғыспаған,
Сонда да
Ғашығымсың бұйырмаған.
Тілерім менің саған
Бақыт қана,
Мен үшін сенсіз өмір
Қиындаған.

Амал нешік,
Екенсің бұйырмаған…

Автор: Оразбай Сарыбаев