Туған жермен сырласу

Уа, Торғай, тыңда мені, қымбатты анам,
Бала боп барсам аунап-қунап қалам.
Желіңе, толқыныңа, жаңбырыңа
Жасқанбай жанымдағы сырды ақтарам.
Орынсыз айқай салып желікпеген,
Мен сенің сабырыңа сеніп келем.
Туған жер, бұл әлемде өзім үшін
Артықсың бар табиғи бөліктерден.
Атылып Ұлытаудан ұрандаған,
Өзенсің көк төсіңде жыр аунаған.
Үні бар толқыныңда құлыншақтың,
Даусы бар келіншектің құраулаған.
Тербеткен бесігісің батырлардың,
Аяулы әз жырысың ақындардың.
Картадан көрінсең де кішкене боп
Өзенсің дүниеге аты мәлім.
Жырлаған қанды майдан жортуылын,
Құлақта, Торғай, сенің толқын жырың.
Әуелде өзің мені ұшырып ең
Әрқашан қонақтайтын бол тұғырым.
* * *
Сүйгісі келіп жұлдыз тұр
Асқардың аппақ төбесін.
Қызғаныш жасап шың-құз тұр
Тартып ап кейін денесін.
* * *
Жапырақ жайып жасыл алақанын,
Қарсы алса қызыл арай дала таңын.
Шөптерге бұлт шықтары қалса тұрып,
Соларға қарауды мен жаратамын.
Селеулер сақалындай кәрі атаның,
Жасырса торғайдың бір балапанын,
Мен соны тауып алып ұшыруды
Баладай қызық көріп жаратамын.
Қылмыстың түсірмей бір қара табын,
Ұстаса сүттей таза ар атағын,
Әділ боп айтқаныңда тұрып қалса
Сол жанды жақын тартып жаратамын.
* * *
Балам бірге толғанда,
Жырға толды жүрегім.
Мен ұқсадым орманға,
Айналамда ну егін.
Өмір осы дейтұғын,
Мен қай заттан кем-тармын,
Өс, өркенде, Бейбітім,
Күзетіңде мен бармын.
Сенің сәби ұйқыңды,
Ат ойнатып кім бұзар.
Есітуге күлкіңді
Дос-жарандар ынтызар.
Бізбен бірге тойлайсың,
Бірге толған күнім деп.
Шешем естіп қоймасын,
Мен айтайын інім деп.
Менің інім, туысым,
Өс, талпынып шарқ ұра.
Құйылған сом құрышым,
Жайна кундей, жарқыра.
* * *
Туған елдің тойында,
Ән салайық бір болып.
Өзендердің бойында,
Жайқалайық гүл болып.
Бір кеудеде қос тілек,
Кірлемесін тот басып.
Тулай соқсын жас жүрек,
Өмір бойы от шашып.
* * *
Жаңбыр болып, табиғат қарлы болып,
Келісе алмай келеді даулы болып.
Өкінеме соларға толқынды өзен,
Өкіреді тынбастан жарды соғып.
* * *
Демалыс күн,
Мен алыспын,
Кетем кезіп қияны.
Жұрт үстінде,
Бұлт ішінде,
Ақын жанның қиялы.
Демалыскүн,
Мен алыспын,
Өлең қызбен жолығам.
Жақын дос-жар,
Ақын достар,
Жүгірмеңдер соңымнан.

---