Бұл өмірде қия алмайтын сәттерім

Бұл өмірде
қия алмайтын сәттерім -
жүрегімнен күй арнайтын сәттерім,
таң атқанша достарыммен ән салып,
жанымды орап нәзік сезім, бал шабыт,
сенің әрбір қылығыңды тамсанып
қиялдайтын сәттерім.
Бұл өмірде
рахатқа батқаным -
өзіңді іздеп тапқаным;
біреулерге үміт отын жаққаным;
жүргендерге жағалай ,,
қауіптеніп, күдіктеніп қарамай -
күлім қағып пәк көңілді баладай
сеніп жүрген шақтарым.
Ана аңсаған
жас сәбидей тәтті едің,
түнгі сырдай сәттерім!
Бақыт құшып құлпырғандай сары далам,
жүрегімде бұлқынғандай арман-ән -
осы менің өмірімді жалғаған
жыл құсындай сәттерім.

---