Қыз сиқыры

Арбалдым сиқырлы әр қылығыңа,
Алдандым жел тербеген бұрымыңа.
Ерітіп жұмыр етті кеудедегі,
Сезімнің тұншықтырдың тұнығына.

Қайғының сүртіп ойдан қара табын,
Асау лүпіл айдады жаңа қаным.
Лаулайды шарпыған от жүрегімде,
Қандай ыстық ұстасам алақаның.

Құйғандай хас шебер таңдап бәрін,
Жүрегінің түбінен жалғап нәрін.
Күйдірді тигенде иығыма,
Пүліштей ақ сезімтал бармақтарың.

Шашыңның енетін әр тарамына,
Айналсам шіркін сенің тарағыңа,
Тәтті күлкің сыйлайды рахат жанға,
Жасырынған бар бақыт жанарыңа.

Құмырсқа бел, талдырмаш мүсініңде,
Ырғалған адымың гүл пішінінде.
Толқындаған жарасымды әсем көйлек,
Ұқсайды жалтыраған түсі күнге.

Қарлығаш қас, аққу сыңды ажарың,
Сұлулықтың көрдім сенен ғажабын.
Қарау үшін сенің бір сәт жүзіңе,
Көтеремін ғұмырымның азабын.

Алланың құдыретіне қайранмын,
Бағыма туды бүгін қайдан күн?
Жалықпай тұрар едім мәңгілік,
Өмірін берсе маған айнаңның.

Авторы: Нұрбек Бекұлы