БІЗ –АНАМЫЗ

Біздер-гүлміз,
Туған жердің төсінде ырғала өскен.
Біздер –нұрмыз,
Шаңыраққа шаттық боп шуақ төккен.
Біздер- күнбіз,
Мейірімге бөлеген бар әлемді,
Біз-самалмыз,
Майда леппен жаныңды есіп өпкен!

Біз-Арманбыз,
Азаматты іңкәр ғып ғашық қылған,
Біз-қорғанбыз,
Көрінетін айбыны асып қырдан!
Біз –орманбыз,
Қорғайтын дауылдан да, жауыннан да,
Біз-жүрекпіз,
Тамырыңнан қаныңды тасыттырған!
Біз-Әйелміз, Біз-Жармыз, Анамыз-Біз!
Бар бақытты осыдан табамыз біз!
Тізерлеткен билеуші Ақсақ Темірді де,
Ажалға ара тұрған Данамыз біз!
Жылу мен қуат толы алақаны,
Жұмақтың кілтін басқан табанымыз,
АНАМЫЗ БІЗ!

---