Қарағанды шахтерлеріне – Әбділдә Тәжібаев

Деген сөз Қазақстан әр қазақты
Мақтантар елдігімен туды уақыты.
Бұл сөзді ар, намыстай ардақтайды
Бар жайлау, бар завод пен барлық шахты.
Неміс те менсінбеген күні кеше,
Селк етіп осы күні «қазақ» десе,
Қалтырап қысық көздер ұшқынынан
Қарайды айналаға дірілдесе.
Оларға мақтанбадық, лепірмедік,
Я бізді тани қой деп өтінбедік,
Беттестік жаяуымен, танкісімен
Келдің деп қапыда сен өкінбедік.
Мәліктер қиын жолды сұрап алып,
Сескенбей сыбап білек тұра қалып,
Танытты қайратын да, айбатын да –
Алысқан неміс мойнын бұрап алып.
Қиынды ермін деме жеңе алмасаң,
Шахтермін деме, көмір бере алмасаң!
Кірлейсің қазақ антын, қазақ даңқын
Бәйге алған озықтарға ере алмасаң.
Жеріңнің асты да бай, үсті де бай,
Кеңдігі сонау бүткіл Европадан.
Болғанмен қандай соғыс міндеттіміз
Жеңуге, әлсіремей, қансырамай.
Жолдастар, босамасын буынған бел,
Алда көп жол соқпағы, асу, белдер.
Бойдағы күш, ойдағы намыспенен
Атағын республика қадірлеңдер!
Әмір сол: шабуылға басады қол,
Батысқа қырғын сала ашады жол.
Сол кезде Қарағанды солдаттары
Ерліктің артында емес, алдында бол!

1942