Жаңылтпаштар жинағы – 10-бет
Маймылдың тісі тіс-ақ,
Түсі түс-ақ.
Істеген ісі іс-ақ
Кісі құсап.
Бірақ ұсақ,
Ұсағы ұсақ!
Ара-тұра тал арала,
Тал ішінде талар ара.
Ара-тұра қала арала,
Таппай сені қалар ара.
Баланы қанағаттандыра алмадыңдар —
Қалаға аттандыра алмадыңдар.
Үш қышқа ұшқыш үш құс қонды.
Таппай қойсаң Жақыпты,
Taп қайтсең де Сақыпты.
Таппай қойсаң Сақыпты,
Taп қалай да Жақыпты.
Сақып жүрмес Сақыпсыз,
Сақып жүрмес Жақыпсыз
Дұрыс деп Тұраш айтты,
Бұрыс деп Бораш айтты.
Жалған деп Жарас айтты,
Рас деп Рәш айтты.
Қайыссы жалған айтты,
Қайыссы рас айтты?!
Бұлаң-бұлаң
Еткен бұл аң
Жүні қылаң
Екен бұлан.
Бізге жүр, жыр жырлайық,
Сізбен бір бір жырлайық.
Баста енді жыр лайық!
Арықтың бәрі ғаріп емес,
Ғаріптің бәрі арық емес.
Ал Әріп арық та емес,
Ғаріп те емес,
Барып көр,
Барып кеңес.
Шашы сары
Сашаның да жасы сегізде,
Шашы сұры
Сашаның да жасы сегізде.
Мазасыз
Жазасыз,
Амалсыз
Азасыз.
Жазасыз
Мазасыз,
Азасыз
Амалсыз.
Айта-айта жақ талды,
Қайта-қайта жатталды.
Қайта-қайта жақ талды,
Айта-айта жатталды.
Бала бұл ең тентек,
Күшіміз теп-тең деп,
Күреспе тектен-тек,
Құлайсың көптен-көп,
Аяғың көктен кеп.
Асанды әсем десем де,
Әсем одан әсемдеу.
Әсемді әсем десем де,
Асан, сірә, әсемдеу.
Бес түп алма
«Бестік» алғандікі.
Төрт түп алма
«Төрттік» алғандікі.
«Төрттік» алған
Бес түп алма алмайды.
«Бестік» алған
Төрт түп алма алмайды.
Дәптерім дәптер-ақ еді,
Жоғалтқан «Қап!»— дер-ақ еді
Қажетке көп жарап еді,
Әлі де көп жері ақ еді.
Мыңның мұңы —
Мұңның мұңы.
Мұңы мыңның—
Мұңы мұңның.
— Мың мін
Бойында кімнің?
— Жалқаудың бойында
Мін мың!
Сендегі басты бас деп,
Әрі алғыр, әрі жас деп,
Алғаның кәрі мәстек,
Ол босқа ішеді ас тек.
Лек-лек үлек келді,
Көп үлек түлеп келді.
Қап-қап қақты
Аппақ апты.
Ақтық қапты
Ақық апты.
Ала ісекті,
Қара есекті,
Сұр құлақты
Сары лақты
Босқа берем
Досқа, дер ем!
Ұзаққа тұзақ — тозақ,
Ұшпайды ұзап ұзақ.
Түседі ұзақ өзі-ақ,
Ұзаққа тұзақ — тозақ.
Сұсты
Түсті,
Ұшты
Тісті
Арыстанға
Барыс таң ба?!
Гәп балда емес,
Гәп әлде.
Гәп малда емес,
Гәп халде.
Әл де,
Хал де
Жоқ па әлде?!
Қоямын деп алып қоймағаннан,
Қоямын демей-ақ қойған артық.
Ардагерді
Жауда көр,
Саудагерді
Дауда көр!
Шын жүйрік торыала ма, қараала ма?
Қарааланы босқа сен қаралама!
Бермеймін қарааланы торыалаңа,
Торыалаң оған таяу бара ала ма?
Қарааланы босқа сен қаралама!
Досқа дос қол бұлғайды,
Қасқа қас қол былғайды.
Қожаш шашын
Сапашқа алдырды ма,
Сапаш шашын
Қожашқа алдырды ма?
Алма алма, бал ал!
Жая алма, Жал Ал!
Жолға ол да жорға алады,
Жорға жолда зорға жорғалады.
Боламыз атама таң:
Бір қызық адам атам.
Мінеді атам атан,
Мінді деп атан атам,
Айтуға бата ма адам!
Көбейсін атұстар,
Болмасын атыстар.
Болса мол атыстар,
Қалмайды атұстар.
Ақынның батылдылырағын айт,
Батырдың ақылдылырағын айт.
Ұстаздың сабырлылырағын айт,
Шәкірттің алғырлылырағын айт.
Мен шоң ба сонда, сен шоң ба?
Кім кіші, шоңы кім сонда?!
Менің нем кем деп ең,
Бер үйді ең кең деген.
Бер үйді ең кең деген,
Менің нем кем деп ең?!
Шірік сырық,
Қырық құрық па?
Қырық сырық,
Шірік құрық па?
Тымақ киіп қасқа басқа,
Міндім мен басқа қасқа.
Әсірелеңкіреген екен
Демеңіз,
Аса ірілеңкіреген екен
Денеңіз.
Әлсіреңкіремей
Денеңіз,
Әсірелеңкіреген
Демеңіз.
- Абдраманов Арсланбек
- Абдраманов Арсланбек
- Абдраманов Арсланбек
- Абдраманов Арсланбек
Барлық авторлар
Ілмек бойынша іздеу
Мақал-мәтелдер
Қазақша есімдердің тізімі