Жаңылтпаштар жинағы – 9-бет
Әсен әсем билеймін деп әлек,
Қасен шешен сөйлеймін деп әлек,
Қашан Қасен шешен сөйлеп еді?
Қашан Әсен әсем билеп еді?
Әсем билегендерін де көргеміз жоқ,
Шешен сөйлегендерін де көргеміз жоқ.
Әпендіше Әкімнің,
Әкелді де әлгінде,
Әпкесінің әтірін
Әлек шашып әркімге.
Әнуар – өнер түлегі.
Әдемі етіп тігеді.
Әмір әбігер, неге әбігер?
Әділ әбігер, неге әбігер?
Әмір мен Әділдің әбігеріндей
Әркімнің әбігерлігі бар.
Әсел әсем бе,
Әсем әсем бе, Әсел әсем бе?
Әсем билегендерiн де көргемiз жоқ,
Шешен сөйлегендерiн де көргемiз жоқ.
Алты алманы алды Алма,
Алды алманы Алдан да,
Алдан, Алма алды алма
Ал, есебін, алданба.
Ақ доп,
Соқ, теп.
Айыр атанды жүк қартайтар,
Семіз қойды май қартайтар.
Күйгелек менің атамды,
Жас қартайтпас, ой қартайтар.
Ақшамда жаққаның
Көк шам ба?
Ақ шам ба?
Мейлің қайсысын жақсаң да!
Ақ тайлағымды бұйдалайын десем,
Бұйдалай алмадым,
Шудалайын десем,
Шудалай алмадым.
Ара-ара аралар,
Орманның бәрін аралар,
Гүлдерден сорып бал алар,
Алысқа ұшып бара алар,
Бал тәтті ғой, балалар.
Ақ тай ақ па?
Қара тай ақ па?
Ақ матадан ақ мақта ақ па?
Ақ мақтадан ақ мата ақ па?
Арал, арал, арал бар,
Бара алар ма балалар?
Батыл бала бара алар,
Аралдарды аралар.
Ақ лағым семіз,
Ақ ала лағым сегіз,
Ала лағым да семіз,
Ақ лағым да сегіз.
Айдын көлде саңқылдап,
Аққу жүзді таранып.
Ауық-ауық жақындап,
Анадайдан қарадық.
Ақ тайлағым –
нар тайлағым!
Нар тайлағыма:
– Атан боларсың! –
деп айқайладым.
Арғы арал, бергі арал
Ол аралдарды жайлаған
Бал аралар.
Аршабек арша деп шыршаны,
Шыршабек шырша деп аршаны,
Шатасты күлдіріп баршаны,
Шырша деп, арша деп шаршады.
Ауылым жоннан көшсе,
Сай құлдилар.
– Анау арал қай арал?
– Қайыңды арал, талды арал.
Ішінде бұзаулы ала марал.
Алатауда неше шың бар?
Қаратауда неше шың бар?
Алатауда бір мың шың бар,
Қаратауда бір мың шың бар.
Ағама ат тағалаттырдым,
Жеңгеме жалын тазалаттырдым,
Апама тоқым жаңалаттырдым,
Өзім бәрін қадағалап тұрдым.
Асқаржаным –
Ашқарағым,
Асқа барың
Бастан мәлім.
Ағашты ол бұтарламағасын,
Мен бұтарламадым.
Ағашты мен бұтарламағанда,
Кім бұтарлайды?
Араның тісі қыши ма?
Баланың қолы қыши ма?
Ара тісі қышымаса,
Балаларды шағар ма?
Бала қолы қышымаса,
Ойыншығын шағар ма?
Атпақ ек бiр-бiр құр,
Қу екен құр құрғыр.
Таптырмай қырдан құр,
Қайттық бiз құрдан-құр.
Асан әсем билеймiн деп әлек,
Хасен шешен сөйлеймiн деп әлек.
Айланбадан арба айланып барады,
Арбадағылар айбарланып барады.
Арықтың бәрi ғарып емес,
Ғарыптың бәрi арық емес.
Ал Әрiп арық та емес,
Ғарып та емес.
Барып көр, берiп кеңес.
Алты қотыр ақ атанға
Алты қолтық отын арттым.
Арғы арал, бергi арал,
Ол аралдарды жайлаған мал аралар,
Қырдың қызыл түлкiсiн қырағы алар.
Асқат
Жамап-жасқап,
Жасапты ақ сапты аспап.
Ақ сапты аспабы –
Жап-жақсы аспап.
Сол тарғыл тарбақ басы ақ баспақты
Мен тарғыл тарбақ басы ақ баспақ демей,
Кiм тарғыл тарбақ басы ақ баспақ дейдi.
Алпыс алты ала баспақ бақтым,
Алпыс алты ала баспақтың iшiнде
Тарғыл тарбақ басы ақ баспақ бар.
Атам томағаламаған бүркiттi
Мен томағаламағанда,
Кiм томағалайды?
Атам:
«Балама ат аламын», – дейдi.
Апам:
«Балама ала мата аламын», – дейдi.
Атасы ат ала ма?
Апасы ала мата ала ма?
Сүйініш ауырса бір,
Үй іші абыр-сабыр.
Қылмайтын абыр-сабыр
Одан да тәуір Сабыр.
Балақты қырық түрік түріп-түріп,
Жүгірді қырық түрік
Тұрып-тұрып.
- Абдраманов Арсланбек
- Абдраманов Арсланбек
- Абдраманов Арсланбек
- Абдраманов Арсланбек
Барлық авторлар
Ілмек бойынша іздеу
Мақал-мәтелдер
Қазақша есімдердің тізімі