Ата-ана қадірі

Дана халқымыз «Ата-анаңа не қылсаң, алдыңа сол келер» деген. Ата-анаға  құрмет   көрсету – асыл парызымыз. Ата-ана – әрбір адамның қайтып соғар қазығы. Оған деген сүйіспеншілік тек жүректен шығуы тиіс. Әсіресе, мейірімнің кәусар бұлағы – Ана есіміне қатыссыз дүниеде ештеңе жоқ. Халқымыздың  ұғымында баланың ата-ана алдындағы парызын өтеуі «Ана сүтін ақтау» деп аталады. «Әкеге бағыну – тәңірге бағыну» деп әкені де қадір тұтқан. Ендеше адам өмірінің мәні мен сұлулығы, адамның болашағына деген сенімділігі – баланың ата-анасын қадір тұтып, өзінің перзенттік парызын бір сәтке де есінен шығармауында жатыр.

Әрқайсымыз үшін дүниедегі ең қымбат жандар ата-анамыз болуға тиіс. Олардан жақын адамдар бұл өмірде табыла қоймас. Өйткені, олар біздің туған кезімізден бастап жанымызда жүріп, қамқорлық жасап,  қолындағы барын бізге береді. Оған қоса балаларым аш, қатарынан қалмасын деп «ішейін деп отырған астарын» біздерге сақтап отыратыны бәрімізге белгілі. Сондықтан  ата-ананың алдындағы борышты өтеу өте қиынға түседі  деп ойлаймын. Туған анамызды әлемдегі мұсылмандар зиярат қылатын Мекке,  Мединеге үш рет арқалап алып барсақ та, анамыздың алдындағы борышымызды ақтай алмаймыз,  анамыздың бізді тербетіп, бір түн ұйықтамаған кезіндегі  борышынан ғана құтылады екенбіз. Себебі, олардың бізге сыйлаған баға жетпес сыйы – өмір. Сондықтан, ата-анаға не істесең, алдыңа өзіңнің балаларыңнан қайтады. Дүние кезек деген осы. Біз өмір бойы жас болып тұрмаймыз. Біз ата-анамызды сыйласақ, біздің балаларымыз да қартайған шағымызда өзімізді күтіп-баптап, бағып-қағатын болады.

Қазіргі кездегі болып жатқан жағдайға келетін болсақ, қартайып, денелерінен күш-қайраты кеткен әке-шешесін қарттар үйіне тапсырып, әр ай сайын олардың зейнетақыларын әкетіп жатқан қыз-жігіттер аз емес екені рас, бұл көңіл қынжытарлық нәрсе.

Ата-ана бізді дүниеге әкелді, ал біздің қолымыздан келетіні сол ата-анамызды ренжітпей, әрқашан оларға көмектесіп, қамқорлық жасап, құрметтеу ғана. Олардың бізге бергенін, біздің оларға беретінімізбен салыстыруға болмайды. Өйткені дүниедегі ең қымбаттысы – өмір. Ал, олар бізге өмір сыйлаған жандар емес пе? Біз оны бағалай білуіміз керек. Міне, сол себепті, біз ата-анамызға барынша қамқорлық жасап, оларды қуантып, ренжітпей  жүру – біздің парызымыз.

Ата-анаңа  қалай  құрмет  көрсетсең, өз балаңнан да солай құрмет көрерсің. Өз балаңыздан  қандай  жақсылық  күтсеңіз, ата-анаңызға сондай жақсылық істеңіз. Себебі  не берсеңіз, соны аларсыз, не ексеңіз, соны орарсыз. Жақсылық қылсаң да  өзіңе, жамандық қылсаң да өзіңе емес пе?! Ақ жаулықты, ақ шашты өз  аналарымыз  бен  данагөй   әкелерімізді ардақтайық, көңілдеріне қаяу, жүректеріне  қайғы салмайық!

Әлеуметтік желілерде бөлісіңіз: