Қайғысыз хан семіз (I нұсқа)

Сырым жаңа атқа мінген жастау кезінде Нұралы ханды көргелі ханның ордасына барады, «кімсің» деген ханға «Сырыммын» деп жауап береді. Сонда хан:

— Сырым-Сырым деген атың жер жарады. Өзің кішкентай ғана арық бала екенсің ғой, — дейді. Сонда Сырым:

— Иә, мен арықпын. Себебі, патша мен сияқты қазақты қонысынан айырып, құмға иірді, жақсы судың бойын казак-орыстарға әперді. Қазақтың қонысын қалай қайтарып аламын деп бір түнде тоғыз ойланып, тоқсан толғанып арып болдым. Бұрынғының айтқаны бар емес пе:

«өлеңді жерде өгіз семіз,
өлімді жерде молда семіз.
Қаралысында қатын семіз,
Қайғысызында хан семіз», — деп.
— Сен — қайғысыз хансың,
Мен — жаралы аңмын,
Мен арық болмай кім арық болады? —

депті Сырым батыр.

Оқуға кеңес береміз:

Жылқының торысы көп пе, төбелі көп пе? (І нұсқа)

Сырымның Нұралы ханды шабуы (ІІ нұсқа)

Баймағамбет сұлтан мен Сырым батыр