Руы адай Атақозының бір әңгімесі (II нұсқа)

Баймағамбет хан қасында Сырымның баласы Қази би бар, тағы да ерткен бірнеше нөкерлері бар үгітпен патшаның үкіміне көндіремін деп жүріп, Адайдың елін аралайды. Адайдың елін аралап жүрсе, алдынан алты-жеті салт атты көрінеді. Қази би Баймағамбет ханға: «Адайдың Атақозысы келе жатыр», — дейді. Сонымен қарсы келіп, аман-сау сұрасып, «мына кісінің тым арығын-ай!» — депті Баймағамбет хан Атақозыға. Атақозы:

— Оның дұрыс тақсыр хан,
Өлеңді жерде өгіз семіреді,
Өлімді жерде молда семіреді.
Қаралысында қатын семіреді,
Қайғысыз хан семіреді деген — рас сөз.
Енді маған келсек:
Бұлт тұр малыңды аламын деп,
Әзірейіл тұр жаныңды аламын деп,
Кәпір тұр дініңді аламын деп.

Бір түнде тоғыз оянамын, тоқсан ойлаймын, осы күйде қалай семіремін, — депті де, жөніне жүріп кетіпті. Ұялған Баймағамбет хан Қазы биге:

— Атақозының бұлай екенін неге аңғартпадың», — депті.

— Егер де мұндай сөзді айта алмаса, адайдың Атақозысы келе жатыр, — деп едім деген екен Қазы би Баймағамбет ханға.

Оқуға кеңес береміз:

Жылқының торысы көп пе, төбелі көп пе? (І нұсқа)

Сырымның Нұралы ханды шабуы (ІІ нұсқа)

Баймағамбет сұлтан мен Сырым батыр