Астана әсерлері

    Астанаға алғаш келген күнім есімде. Бұл қаланың ауасы да, аспаны да, ырғағы да өзгеше. Мұнда бәрі тым кең, тым биік, тым маңызды секілді. Бір сәтте-ақ өзіңді үлкен өзгерістердің ортасына түскендей сезінесің. Бұл — жай ғана бас қала емес, бұл — жаңа мүмкіндіктердің, үлкен армандардың бастауы.

Қаланы аралай бастағаннан-ақ оның рухы мен ритмін сезіне бастайсың. Бір жағынан — тарих, екінші жағынан — болашақ. Бір көшесінде Тәуелсіздік сарайы мен Бейбітшілік пен келісім сарайы секілді терең мағыналы нысандар тұрса, келесі бұрылыста заманауи кеңселер мен цифрлы дәуірдің бейнесі қарсы алады. Бұл — өткен мен ертеңді ұштастырып тұрған қала.

Бәйтерекке көтерілгенде, төменде жайылып жатқан қаланы көріп, еріксіз ойға батасың: қалайша осындай қысқа уақыт ішінде осындай биік, заманауи, салмақты шаһар бой көтерді? Бұл — жай ғана құрылыс емес, бұл — елдің сенімі мен ерік-жігерінің көрінісі.

EXPO кешенінің маңында жүргенде болашақтың іргетасын өз көзіңмен көргендей боласың. Ал Есілдің бойымен серуендеген сәтте, қала үнсіз тіл қатып тұрғандай күй кешесің. Желмен тербелген су беті, алыстан көрінетін зәулім ғимараттар — бәрі ерекше бір тыныштық пен сенімділік сыйлайды.

“Астана – суық қала” деп жатады. Иә, қыс айларында мұнда аяз бет қарып түседі. Бірақ сол суықтың ар жағында — мейірім бар. Себебі бұл қалада адамдар үмітпен өмір сүреді. Бұл қалада «боламын» дейтін жастар көп. Бұл қалада әркім өз орнын табуға тырысады.

Астана — тек Қазақстанның астанасы емес, әрбір арманы бар жастың символы. Бұл — сенімнің, жаңарудың, дамудың қаласы. Мұнда әр көше, әр ғимарат, әр адам сені алға жетелейді. Бір рет келген жан бұл қаладан әсерсіз кете алмайды.

Астана — жүрекке әсер ететін, болашаққа жол сілтейтін қала.

«Journiverse» білім беру орталығының оқушысы: Болат Аяжан