Заманауи музыка – еркін ойдың көрінісі

   Бүгінгі таңда музыка — тек көңіл көтерудің құралы емес, адамның ішкі сезімін, ойы мен көзқарасын еркін жеткізудің тіліне айналды. Әсіресе заманауи музыка қазіргі қоғамда жастардың еркін ойлауына, өз пікірін ашық айтуына мүмкіндік беріп отыр. Музыка — бұл тек өнер емес, ол қоғамдағы өзгерістердің, ұрпақтың рухани деңгейі мен мәдени жаңарудың айнасы. Заманауи музыканың басты ерекшелігі — еркіндік пен әртүрлілікте. Қазіргі таңда әрбір орындаушы өз бағытын, стилін еркін таңдай алады: бірі реп арқылы ойын жеткізсе, енді бірі поп, рок, джаз немесе этно жанрында өзін табуда.

Халықаралық музыкалық индустрияның дамуы да осы еркін ойдың нәтижесі. IFPI ұйымының мәліметінше, 2023 жылы әлемдік музыкалық нарықтың жалпы табысы 28,6 миллиард АҚШ долларына жетіп, алдыңғы жылмен салыстырғанда 10,2%-ға артқан. 2024 жылы бұл көрсеткіш тағы шамамен 4,8%-ға өскен. Бұл деректер заманауи музыканың қоғам өміріндегі рөлінің күшейіп келе жатқанын дәлелдейді.

Бүгінде стриминг қызметтері музыканы таратудың басты арнасына айналды — қазіргі жастар музыка тыңдау уақытының шамамен 60%-ын онлайн платформаларда өткізеді. Бұл заманауи музыканың цифрлық мәдениетпен тығыз байланысын көрсетеді.

Қазақстанда да музыкалық сала қарқынды дамып келеді. AIFC деректері бойынша, еліміздің шығармашылық индустриясындағы музыка секторының үлесі 2024 жылы шамамен 1,7 миллиард теңгені құраған. Бұл — музыканың ұлттық мәдениет пен экономикалық дамудың арасындағы көпірге айналып келе жатқанын білдіреді.

Қазіргі қазақстандық өнерпаздар ұлттық әуендерді заманауи ырғақпен үйлестіріп, тың дүниелер ұсынып жүр. Бұл үрдіс — дәстүр мен жаңашылдықтың тоғысуы, ал осының бәрі заманауи музыканың басты миссиясын — еркін ойды жеткізуді айқындайды. Қазақстандық жас орындаушылар да бұл үдерістен тыс қалған жоқ: олар ұлттық мәдениетті заманауи ырғақпен ұштастырып, әлемдік сахнаға жол ашып келеді.

«Journiverse» білім беру орталығының оқушысы: Қуанышбайқызы Альбина