Қоршаған ортаны қорғау – әр адамның міндеті

     Қазіргі таңда экология мәселесі бүкіл әлемді алаңдатып отыр. Жыл сайын дүниежүзінде 2 миллиард тоннадан астам тұрмыстық қалдық жиналады. Орта есеппен бір адам күніне 0,74 келі қоқыс шығарады. Ал дамыған елдерде бұл көрсеткіш 4–4,5 келіге дейін жетеді. Табысы жоғары мемлекеттер әлем халқының небәрі 16 пайызын құраса да, барлық қалдықтың 34 пайызын өндіреді.

Пластик қалдықтары ерекше қауіп төндіреді. Жыл сайын ондаған миллион тонна пластик жиналып, топырақ пен су көздерін ластайды. Көптеген елдерде қоқыстың 80–90 пайызы қайта өңделмей, полигондарға төгіледі. Егер нақты шаралар қабылданбаса, 2050 жылға қарай қалдық көлемі едәуір артуы мүмкін.

Қазақстанда жыл сайын шамамен 5 миллион тонна қоқыс жиналады. Алайда оның тек 20 пайызы ғана қайта өңделеді. Бұл қоршаған ортаның ластануына, ауа сапасының төмендеуіне және адам денсаулығына зиян келуіне себеп болады. Қоршаған ортаны қорғау – тек мемлекетке жүктелетін міндет емес. Қоқысты сұрыптау, пластикті аз қолдану, табиғатты таза ұстау – әр азаматтың жауапкершілігі. Табиғатты сақтау бүгіннен басталуы керек.

“Journiverse” білім беру орталығының оқушысы: Дарханқызы Дина