Сәкен әні – Ғафу Қайырбеков

Сейфолла Оспановты еске алу

«Келемін тау ішінде өлеңдетіп,
Аймақты тебірентіп, елеңдетіп»,—
Осы әнге шырқаушы еді бір азамат,
Қалушы ед қайран көңіл көкке жетіп!
Ұлытау, Ортау, Ақтау, Қарқаралы,
Арқаның шалқушы еді шартарабы.
Аулыңның есуші еді ақ самалы,
Арудың елестейтін ақ тамағы.
Айтатын: «ағам салған ән еді-ау!» — деп,
Көңілдің көк жайлауы - сән еді-ау! — деп
Тіршілік — бір ақбоз ат ойнақтаған,
Ойлама күнде астымда бар еді-ау! — деп.
«Қалайық шауып, желіп, қанаттанып,
Мәз болмай ұйықтағанға, тамақтанып» —
Деуші еді, арғымақтай жігіт еді,
Кетер деп кім ойлаған о да аттанып!
Еседі Сәкен әні ер күшіңдей,
Асылдың арғысы мен бергісіндей.
Алдағы ардақтаған арманыңдай,
Арттағы сағыныштың белгісінде