Алаш ұраны – Лұқпан Сисекенұлы

(Дүйсенбі Әріпұлына)

Біз қазақ жасампаз елі бар,
Ер Түрік тегінен таралған.
Алаш боп киелі ұраны,
Азаттық таңы үшін тау жарған.
Кең пейіл бауырмал халықпыз,
Тәңірдің нұрынан нәр алған.
Шыңдалып сұрапыл сан сында,
Із салған ғасырдан ғасырға.
Жалыны ертеңге ұласып,
Қол созған шыңдардан асуға.
Арманы ең асқақ халықпыз,
Жаралған жеңістер жасауға!
Елімнің бейбіт күн тілегі,
Ислам мәңгі өшпес тірегі.
Күн қыран көк туы астында,
Бөгелмей бөрідей ерлері,
Кектенсе от жаны алаулап,
Айналар жасынға көктегі.
Елдігі, ерлігі жыр аңыз,
Бабадан бұзылмай қалған із.
Қастерлеп өр даңқын жырлаумен,
Жаңғыртып жолдарын жалғаймыз.
Ақтауға үмітін,сенімін,
Анадан ер болып туғанбыз.
Қанында ойнаған өжеттік,
Қазақпыз, қазақ боп ержеттік.
Тәңірдің соғылған, таңбасын,
Ешкімде бұза алмас өзгертіп.
Ел үшін жасаймыз ерліктер,
Ар туын жоғары көтеріп!