Өлең, жыр, ақындар

Сол бір шақтар есімде

  • 12.06.2019
  • 0
  • 0
  • 2092
(Х-ның сұрауымен жазылған)

Асыға аңсап барғанымда алдымнан
Айдай толқып қарсы алғаның есімде.
Жүрегімде өшпейтін із қалдырған
Шын елжіреп, шын жанғаның есімде.
Әсем асқар Алатаудың шыңындай,
Сұлу сындар зипа бойың есімде.
Манас құшқан Қанікейдің сырындай,
Опалы жар асыл ойың есімде.
Тарқатылған қолаң шашың оралып,
Жүрегімді күйдіргенің есімде.
Қыпша белің алтын сымдай бұралып,
Демің аңқып сүйдіргенің есімде.
Күндей балқып Ыстықкөлге үңілген
Нұрлы сәулең шалқығаны есімде.
Айрылысарда назбен қимай бүгілген,
Ыстық жас ап балқығаның есімде.
Жүрегіме қадалғандай кірпігің
Қарағанда арбалғаным есімде.
Көзіндегі махаббат жас бүртігі
Айрылысарда бір тамғаны есімде.
Шараб, шампан ақық кесе ұсынып,
"Ақбөкенді" белгі еткенің есімде.
Сүйгеніңді сонда есіңе түсіріп
Ішерсің деп серт еткенің есімде.
Осы бір жыл, осы бір ай, осы күн,
Сәтті сағат саяхатты кешімде,
"Хош бол, ботам, есіңе ұста",- деген үн
Мәңгі жүрер от жалын боп есімде.



Пікірлер (0)

Пікір қалдырыңыз

Мейізек

  • 0
  • 0

Заулап желеді қос күрең ат,
Мен келемін батып ойға,
Туған жерді сүйе қарап,
Сыр пернесін шерткен бойда.

Толық

Жаңа қала

  • 0
  • 0

Ашылып алып аймағы,
Ақтарылған асыл кен,
Тақтасын кертіп сайдағы
Атырабын үңгіп ашып кең.

Толық

Көктем

  • 0
  • 0

Көңілді көкке өрлетіп көктем жыры,
Көл шалқып көк майса боп ой мен қыры,
Сылаңдап сылқ-сылқ күліп сайда бұлақ,
Мал мен жан масайраған жазғытұры.

Толық

Қарап көріңіз

Пікірлер