Өлең, жыр, ақындар

Алатау тізбектері

  • 30.07.2019
  • 0
  • 0
  • 1074
Көріп пе ең Алатаудың тізбектерін?
Мәңгілік мызғымаған мұз бөктерін?
Қазақтың жазық жатқан жайлауынан
Әдейі тау жотасын іздеп келдім.
О, шіркін, жердегі өмір өмір ме екен?
Қарасаң шыңға шығып, өмір бөтен.
Көргенде дүниені төбесінен,
Шалқыған дариядай көңіл бөтен.
Қиырсыз байтақ жатқан дала қандай?
Тап қазір аумағы оның алақандай.
Мен тұрмын қомақтанып шың басында,
Ұшатын қияндарға балапандай.
Тұрғандай тұманданып тұндырадан,
Терістік тым алыста бұлдыраған.
Төбеден төңкеріліп тентек Талғар,
Өзендер төмен қарай құлдыраған.
Көтеріп найзаларын сапқа тұрған,
Шыршалар айнымайды сақ батырдан.
Күміс қар шың басында жарқырайды,
Секілді ақ сауытпен қаптатылған.
Тұрғанда тамашалап шың басында,
Тұрғандай боласың тап күн қасында.
Тұр, міне, Талғар шыңы табанымда,
Тәкаппар өр сезім бар тұлғасында.
Аралап шатқалын да, құздарын да,
Өткердім ыстығын да, ызғарын да.
Секілді ойнақ салған бала киік,
Жүгірдім жалтыраған мұздарында.
Тастары қатты батып табаныма,
Аяғым әлденеше қанады да.
Алдымнан сан қиындық кезіксе де,
Тосқауыл бола алмады талабыма.
Тура жол көргенім жоқ шың басына,
Жылжыдым бірде баяу, бірде асыға.
Өмірдің өзі нұсқап жол көрсетті,
Арманның көзі жетіп тынбасына.



Пікірлер (0)

Пікір қалдырыңыз

Қалталар

  • 0
  • 0

Бір-біріне барабар
Бізде екі бала бар.
Бірінің аты Балтабай,
Екіншісі Қалтабай.

Толық

Төрт қыз

  • 0
  • 0

Бір үйде төрт қыз тұрады,
Қашықта емес тұрағы.
Секілді күннің шуағы,
Көңілді бірден бұрады.

Толық

Медеу

  • 0
  • 0

Алатаудың ақтарылып ақ қары,
Шақырады шаттығына шатқалы.
Құзар шыңы көзді тартып қияннан,
Бал үнімен балқытады бақтары.

Толық

Қарап көріңіз